《情侶陰德值》
積陰德我諗大家都唔陌生，即係做好事，令你下一世有好少少嘅命運。
但我同我班已婚兄弟之間都有一個積陰德嘅講法，本來以為係圍內用語，點知原來係人夫之中係通用語言。
有一次同班唔熟嘅朋友打波，打完之後我話要去買糖水返屋企俾老婆食，有人話咁係二十四孝老公，我好自然咁講咗句，積吓陰德啫，唔係平時想同朋友打機吹水飲野都唔駛旨意。
點知佢都講，係啊，種善恩得善果，阿彌陀佛，你去邊買，一齊去啦！
一齊買糖水嘅期間，大家傾開夫妻相處之道簡直好似相逢恨晚咁，大家都好同意陰德呢樣野，或者你會覺得有少少難聽，但男人就係咁，要搵個有趣嘅詞去講先過癮，女士們千祈唔好認真同嬲。
好多情侶或夫妻都會有一個問題，女方覺得男陪得唔夠多，男覺得女唔比自由自己，其實來來去去都係一種供求問題，而要好好解決呢個問題，通常都需要從男方出手，積陰德就係一個先付出後回報嘅概念。
女人呢種動物好複雜，但又好易理解，複雜在於，你同佢嘈係永遠都唔會有好結果，你講東佢講西，你講理性佢講情感，你講數字佢講感覺，你講事實佢講幻想；而簡單個部份係，你滿足咗佢，佢就會回報返比你。
你需要做嘅係，每一個生活細節都做好佢，出街返去要買糖水，行街睇到咩野好就買比佢，Facebook睇到咩得意野要tag佢，返到屋企做好家務，每日交代吓自己今日過得點等等。
如果陰德有數字，你每做一樣就會加分，到你有50分時，你就可以換取一次出去同朋友飲野嘅機會，到你100分時，你就可以解鎖新姿勢，到你300分時，你就可以得到一份禮物之類（以上人人換領pool都唔同，不可一概而論）。
而當你得到想要嘅野之後，就要重新再積過。
或者你會諗，男女之間唔可以直接簡單咩？我結咗婚又好，拍拖都好，都有自己自由啊！但一段關係，你揀得佢，佢唔滿足唔開心唔高興，無論原因有幾騎呢都好，佢都係你另一半，你都要去滿足佢，當然你可以選擇離婚或分手，咁你就會最自由。
有一句好到肉嘅說話：「曾經我以為女仔養吓養吓就會長大，點知佢仲係好細路女……」講出女人係相處之中，係唔會大，亦可以話，除咗佢老豆老母之外，佢只會係你身邊仲可以做一個細路女，一齊得，佢就只有你，到有日你變得可有可無，佢唔會過問你一切，亦有自己生活你無從過問，咁同朋友有咩分別呢？
男士們，學識付出先，你終會得到回報。
你會問，如果我做幾多佢都唔欣賞唔比空間你咁點算？分手啦！你已經練成好武藝，出到去你怕搵唔到好女仔？佢一定損失大過你囉！
好人一世平安！
Search